قصائد جيرودية
حُبْ ببيت اْلمُوتور |
الأم _ وليه فاطمه ! . .
من وين هالشحبار على روبِكْ
البنت _ نَفْضَتْ عليِّي الصـوبيه يَمِّي
الأم _ أني صوبيه ؟ .يـبعثلِكْ الحمِّه
بتمُّوز إحنِه . . ونيسيه شوبِكْ
* * *
البنت _ بقصُد الصوبيةْ اللي بالحمّـام
الأم _ حاجِك كذب ومْنَـلّها المـازوت
من سنِه عم نتغسَّل بهالـموت
لا مَيْ سخنِه ولا دفا ولا صخام
* * *
البنت _ ييه أمي . . . الشـك حـيفِر قلبها
بتظل تحرص عالبنت وغـراضـها
وتسأل عن البيضه منو اللي باضها
الأم اللي بتـدقـدِسْ . . ألله بحبها ؟ ! .
* * *
الأم _ مالت العمى . اشـلحي التنورة
وشوفي النجاج الليزِق بـظهـرِكْ
نشـالله إلاهي ينقصـف عـمرِكْ
متل الهوى ما بيقصـف الحـورة
* * *
البنت _ إي تذكَّرتْ يمِّي . . فحم أركيلـه
تدعثرت بالكيس اللي بالصيـره
الأم _ بلا كذب حاج تهندزي السـيره
ظهرِكْ كأنَّه حيمِـل جـعـيـلِه
* * *
البنت _ صحيح والله لزقْتْ بالخـلـقـين
وعم قول شو اللي دبَّق بظهري
مو بس ظهري تطلَّعي إجـري
كثير الجعيلِه موسَّخه تخمـين
* * *
الأم _ صارت الحجِّه شـوي مقبولِه
روحي اشلحي يلعن أبو شرشِكْ
لَكْ هاذ بزِّكْ بَـعْرفهْ هِـلشِـكْ
قـبـلِك أنا دوَّخـتْ حامولـه
* * *
{{ وراحت تغيِّر روبها المسْوَدْ
شافت عالخزِينه شو حالتها
المحروق واصِل لا بطانتها }}
البنت _ مليح اللي أمي رِضْيِتْ بهالقد
* * *
البنت _ وقلتْ لَهْ بالكرم . . قلّي : طين
وقلتْ لَهْ بالحور قـال انْـقَصْ
مَـعَّـكْ إيديّي بالرجا والرص
وقلبي صفي مهروس متل التين
* * *
محمِّد ذِبِح (منشان ألله) . . صبور
بوَّسْ اجـريِّي وصار متل القوس
لَكْ . .
يـلعن يقـينَك مع يـقين البوس
وصارت الخبصه بْبيت هالموتور
* * *
والقشـطمان بجـنبنا مـمـدود
لا عاد حـسِّـينا بلذع ولا نـار
لا بزيت هالمحروق لا بشحـبار
حب البريري جنون مالا حـدود
* * *
طلعِتْ الشمس وفاحت السيرة
العمى ! شو ليبِسْ يَمال القوم صارتْ عَ كل لسين هالسيره
أنا قلتـلَك ما هو وقتها اليوم شَـتَّمتْني وسوِّيتْ تكشـيره
إِي أَ قَر* إلاّ تنقْ بعـد النوم نـقّةْ جدي مربوط بالصـيره
الحيوان موسم رغبته معـلوم كل عام دهْكِه وفكَّـتْ السـيره
لكـن إنت شو شَلْهَفَةْ مفـطوم على طول صِيرِفْ مثل بـكّيره
(ولَكْ سكّري هالبوز بوز الـبوم أدِّيش خمخمتي يَـ خـنزيره)
ومن بعد هالغزل الحلو المسموم تد حْوَشْتْ فييّ وصَرلَكْ شخيرِه
عَضِّيتْ أذني وحَسْوَستْ الخشوم كركرتني وكـزِّيـت عالنـيره
بعز الهنا سمعنا أبوك يحــوم كنُّو نوى للـبـاب تكـسـيره
بتظل ليزِق بالمرا ومطشــوم ما في بجلدَكْ حـس بالـغـيره
صـار الظهر لَكْ شدّْ عصَبَكْ قوم ما حـد وصـل إيخـر التقويره
وقـمنا أنا ويّاه متـل الـثوم سِـنِّين كـنَّا بـعد تقـشـيره
ورحنا لنحصد : (أحمِد وفطُّوم) يتـقهقهوا ويتصنَّعُـوا الحيره
ويقلّها ( حـملت قرع الكروم ) (سبلة قمح وبقلبـها شعيره )
وتقول فـطومة يا عـيب الشوم ناقص فضيحة بعد تـسـتـيره
وعن لبـسنا كان الـحكي واللوم ثيري اجرينا "فلم" . . . تعثيره
يـيه ! ليبِسْ مكشكشي الملطوم وأنا ليبسه الأبيض أبو زريرِه
خيطان الذكرى
فوق النعنع تحت الحور
لما الشمس تناغي الفيّْ
والبركة يغازلها جرور
وإجرينا كانت بالميّْ
* * *
طراوة ذيك الكلمات
ورقات الشب الزريف
مرويّة بنفس المَيّات
منثورة من دون تكليف
* * *
تحكي وتحكي تلات ساعات
عيوني حول شفافا تدور
بين الكلمات وكلمات
قلبي جناحات العصفور
* * *
إسمعلا 00 ورقرقة الميّْ
تضفي عا صوتا ألحان
بعض الأحرف راحت طيّْ
بين الميّة والأغصان
* * *
هبَّت نسمة من البستان
المكشكش عالركبة طار
يهفهف كنّو عرف حصان
ياخدني أروع مشوار
* * *
قطرات الميّْ اللي تطير
توصل للركبة وترجع
متل النمنم عالحرير
خيطو الشفّاف تقطَّع
* * *
ما عدْ صفّا بوجهي عيون
طاروا 000 زهرة شوكيّة
انتبهت000 قالت يا مجنون
لسّا ما شفت اجريّة
* * *
وشدَّت المكشكش بنزول
صورة 000 بقلبي ما بتعتق
وجه الفلاّحة المخجول
وزغب شفافا بس تعرق
* * *
خيطان الذكرى بقلبي
غزلتها كفوف الأيّام
وصارت منديل محبِّه
مطويّة بعُب الأحلام
* * *
كل ما غبَّش عمري شوَيّْ
بمسح فيها الدمع المُرّ
بيبقى الطيف الأخضر حيّ
مهما فصول النار تمر ضباء _1998\9\24
بتتذ كَّري يوم اللي كنّا زغار
نلعب سوا ونحاور المشوار
نرسم خيالات التلج عالصيف
وجه الشتا دفتر لعين النار
* * *
اسمك ربي بقلبي متل واحة
حروفو متل تمثال بساحة
تركوا عَ حيطان القلب آثار
عضّةْ طفل بخدود تفاحة
* * *
بتتذكري 00؟ الأحلام برية
الذكرى مهر فلتان من ديّي
يبرطع بأرض حدود ما إلها
جوّ وفلا ورياح أمية
* * *
بتتذكري لما السما نامت
وتلحَّفَتْ بالغيم وتعامت
لا كرمتْ بقطرة على العطشان
ولا النفس عن حب المطر صامت
* * *
بتتذكري ؟؟…
ضباء
1998\9\25
عـشــتار
عشتار سمّيت البنت ؟
شو هالأسم ؟
وتفكّرتْ
جبتْ الفصاحة ضادها وقاموسها
كتب التراث استحضرت ناموسها
ولبست روح الفاقده
وأنظارها
فتِّش لغتنا
حفِّز ءْ حاسيسها
من وين جايب هالأسم؟
شو مصدرو بلهجاتنا؟
شو بينعرب ؟
فاعل ..
فعل ..
مبدأ ..
خبر ؟؟؟؟
نوطة لحن ؟
لوحة رسم ؟
صورة حلم ؟
موقد فكر ؟
لا لا وحق العلَّمْ الهدب الغمز
مش هيك معنى هالأسم
عشتار يمكنّو رمز
يمكن كرْم يعصر سَمَرْ
يمكن لغز
يمكن قمر
بلكي شمس؟
بلكي عتم
شو هالأسم شو هالأسم
عشتار ؟
يا عون السما
أجلي ملامح هالعمى
عن عين جهلي والغمى
والمعرفة يصرلا رحم
تحبل فهم
تولد فهم
يصفى الوعي خِلْفِه ونسبْ
مبروك فينا العافية
مبروك فينا هالشفا
يقظةْ عشق
حلم بغفا
صح السواقي تعكَّرت
لكن عيون النبع ديماً صافيه
وعند الفجر كل الجداول صافيه
* * *
ضو الشمس
خمَّر حلم
عنقد كرم
نضَّج قمح
قمَّر خبز
غيَّب لغز
عشتار ما صفّا لغز
أحلى أسم
حب وفدى
عز بسلم
("عشتار" كانت آلهة حب وندى)
ما شعَّلَتْ فانوسها
من يوم ما غمرت صدر قدموسها
لكن الطفلة العم تناغي آنّـا
ربةْ مواسم واعده
ربةْ محبه صاعده
أرض الوطن قدموسها
وأرض الوطن
روح الحياه ناموسها
